22/03/25
editor
മോണ്ടിവിഡിയോ: ഇരുടീമും പകുത്തെടുത്ത രണ്ടു പകുതികൾ. അതിലൊന്നിൽ വിധിയെഴുതിയ തിയാഗോ അൽമാഡയുടെ കണ്ണഞ്ചും ഗോൾ. ലയണൽ മെസ്സിയെന്ന അതികായനില്ലാതെ മൈതാനത്തിറങ്ങിയ അർജന്റീനക്ക് അൽമാഡ പുതിയ ഹീറോയായി. ലോകകപ്പ് ഫുട്ബാൾ യോഗ്യതാ റൗണ്ടിൽ കരുത്തരായ ഉറുഗ്വെയെ അവരുടെ തട്ടകത്തിൽ ലോകജേതാക്കൾ അടിയറവു പറയിച്ചത് അൽമാഡ 68-ാം മിനിറ്റിൽ നേടിയ മനോഹര ഗോളിൽ. ഒന്നാം സ്ഥാനത്ത് ആറു പോയന്റിന്റെ ലീഡുമായി അർജന്റീന 2026 ലോകകപ്പിൽ ഇടം ഏറക്കുറെ ഉറപ്പിച്ചു. അഞ്ചു കളികൾ ശേഷിക്കേ, നേരിട്ടുള്ള യോഗ്യതക്ക് ഒരു പോയന്റ് മാത്രം അകലെയാണ് നിലവിലെ ചാമ്പ്യന്മാർ.
ചിരവൈരികളായ ബ്രസീലിനെതിരായ മത്സരത്തിന് മുമ്പായി അർജന്റീനക്ക് ആത്മവിശ്വാസം പകരുന്നതായി ഉറുഗ്വെക്കെതിരായ ജയം. ഈ മാസം 26ന് ഇന്ത്യൻ സമയം പുലർച്ചെ 5.30നാണ് അർജന്റീന-ബ്രസീൽ പോരാട്ടം. ബ്രസീലിനെതിരായ കളിയിൽ സമനില നേടിയാൽപോലും തെക്കനമേരിക്കൻ ഗ്രൂപ്പിൽനിന്ന് 2026 ലോകകപ്പിന് യോഗ്യത നേടുന്ന ആദ്യടീമാകും അർജന്റീന. ഗ്രൂപ്പിൽനിന്ന് േപ്ലഓഫ് കളിക്കാനുള്ള യോഗ്യത അർജന്റീന ഇതിനകം ഉറപ്പിച്ചുകഴിഞ്ഞു.
