സംസ്ഥാനത്ത് അമീബിക് മസ്തിഷ്‌കജ്വരം വ്യാപനം

22/10/25

തിരുവനന്തപുരം: പ്രതിരോധം ലംഘിച്ച് അമീബിക് മസ്തിഷ്‌കജ്വരം കേരളത്തില്‍ വ്യാപിക്കുന്ന സാഹചര്യത്തില്‍, ചികിത്സ മാര്‍ഗനിര്‍ദ്ദേശങ്ങള്‍ പുതുക്കി പരിഷ്‌കരിക്കാന്‍ ആരോഗ്യവകുപ്പ് ആലോചന നടത്തുകയാണ്. രോഗബാധിതരിലും പുതുതായി രോഗം സ്ഥിരീകരിക്കുന്നവരിലും കാണുന്ന വൈവിധ്യമാര്‍ന്ന ലക്ഷണങ്ങള്‍ പുതിയ നടപടികള്‍ ആവശ്യപ്പെടുന്നതാണ്. ആരോഗ്യവകുപ്പ് ഇതുവരെ വെള്ളമാണ് രോഗത്തിന്റെ പ്രധാന ഉറവിടം എന്ന് ഉറപ്പിച്ചിട്ടുണ്ടെങ്കിലും, ഇടപഴകാത്തവര്‍ക്കും രോഗം ബാധിക്കുന്ന സാഹചര്യമാണ് ആശങ്ക ഉയര്‍ത്തുന്നത്. ഈ വര്‍ഷം ഇതുവരെ 129 പേര്‍ക്ക് രോഗം സ്ഥിരീകരിച്ചു, വെള്ളിയാഴ്ചവരെയുള്ള കണക്ക് പ്രകാരം 26 പേര്‍ മരിച്ചിട്ടുള്ളതായി റിപ്പോര്‍ട്ട് ചെയ്യുന്നു. ഈ മാസം 18 ദിവസത്തിനിടെ 41 പുതിയ കേസുകളും അഞ്ച് മരണങ്ങളും റിപ്പോര്‍ട്ട് ചെയ്തു.