28/10/25
ദുബായ് : വെർച്വൽ പ്രൈവറ്റ് നെറ്റ്വർക്ക് (വിപിഎൻ) ആപ്ലിക്കേഷനുകളുടെ ഉപയോഗത്തിൽ ലോകത്തിലെ തന്നെ മുന്നിലുള്ള രാജ്യമായി യുഎഇ മാറിയതായി റിപ്പോർട്ട്. കഴിഞ്ഞ അഞ്ചര വർഷത്തിനിടെ രാജ്യത്ത് വിപിഎൻ സ്വീകരണ നിരക്ക് ഏറ്റവും ഉയർന്നതായാണ് സൈബർന്യൂസ് റിപ്പോർട്ട് ചെയ്യുന്നത്.
2020 മുതൽ 2025-ലെ ആദ്യ പകുതിവരെ യുഎഇയിലെ വിപിഎൻ സ്വീകരണ നിരക്ക് 65.78 ശതമാനം ആയിരുന്നു. ഖത്തർ (55.43 ശതമാനം), സിംഗപ്പൂർ (38.23 ശതമാനം), നൗറു (35.49 ശതമാനം), ഒമാൻ (31 ശതമാനം), സൗദി അറേബ്യ (28.93 ശതമാനം) എന്നിവയാണ് പിന്നാലെ വന്നത്.
2025ലെ ആദ്യ ആറുമാസത്തിനുള്ളിൽ മാത്രം യുഎഇയിൽ 61.1 ലക്ഷം വിപിഎൻ ആപ്പുകൾ ഡൗൺലോഡ് ചെയ്തതായി കണക്കുകൾ വ്യക്തമാക്കുന്നു. 2024-ൽ 92 ലക്ഷം, 2023-ൽ 78 ലക്ഷം, 2022-ൽ 65 ലക്ഷം ഡൗൺലോഡുകളായിരുന്നു. ഇതേ വേഗത്തിൽ തുടർന്നാൽ ഈ വർഷം കഴിഞ്ഞ വർഷത്തെ കണക്കുകൾ മറികടക്കുമെന്നാണ് വിലയിരുത്തൽ.
