എസ്.എൻ.ഡി.പി കേന്ദ്ര ഓഫിസിന് ജപ്തി; വിവാദങ്ങളുടെ നടുവിൽ വെള്ളാപ്പള്ളി

13/03/2026

Ramzun

വെള്ളാപ്പള്ളി നടേശൻ നേതൃത്വം നൽകിയ ശ്രീ നാരായണ ധർമ്മപരിപാലന യോഗം (എസ്.എൻ.ഡി.പി യോഗം) സംബന്ധിച്ച സാമ്പത്തിക വിവാദങ്ങൾ വീണ്ടും ചർച്ചയാകുന്ന സാഹചര്യത്തിലാണ് സംഘടനയുടെ കൊല്ലത്തെ കേന്ദ്ര ആസ്ഥാനം ജപ്തിയിലായത്. കേരള സ്റ്റേറ്റ് ബാക്ക്‌വേഡ് ക്ലാസ്സ് ഡെവലപ്‌മെന്റ് കോർപറേഷൻ നൽകിയ വായ്പയുമായി ബന്ധപ്പെട്ട കേസിലാണ് നടപടി ഉണ്ടായത്. മൂന്ന് ശതമാനം പലിശ നിരക്കിൽ ഏകദേശം 15.85 കോടി രൂപ 2775 സംഘങ്ങളുടെ പേരിൽ എടുത്തതായി രേഖകളിൽ കാണിച്ചിരുന്നെങ്കിലും, ഇവയിൽ പലതും വ്യാജ സംഘങ്ങളാണെന്ന ആരോപണം ഉയർന്നിരുന്നു. ഇതുമായി ബന്ധപ്പെട്ട് 4.5 കോടി രൂപയുടെ വായ്പ കേസിലാണ് 2017ൽ എസ്.എൻ.ഡി.പി ആസ്ഥാനം ജപ്തി ചെയ്തതെങ്കിലും പിന്നീട് കേരള ഹൈക്കോടതി തുടർ നടപടികൾക്ക് സ്റ്റേ അനുവദിച്ചിരുന്നു. വായ്പയിലെ ബാക്കി തുക സംബന്ധിച്ചും ഇപ്പോഴും വിവിധ കേസുകൾ നിലനിൽക്കുന്നു. പിന്നാക്ക വിഭാഗ കോർപറേഷനിൽ നിന്നുള്ള പണം മൈക്രോഫിനാൻസ് സംവിധാനത്തിലൂടെ കൂടുതലായ പലിശയ്ക്ക് തിരിച്ചുനൽകി തട്ടിപ്പ് നടത്തിയെന്നാണ് അന്വേഷണ ഏജൻസികളുടെ ആരോപണം. മൈക്രോഫിനാൻസ് തട്ടിപ്പുമായി ബന്ധപ്പെട്ട് വെള്ളാപ്പള്ളി നടേശനെതിരെ ഏകദേശം 124 കേസുകൾ വിജിലൻസ് അന്വേഷണ പരിധിയിലുണ്ടെന്നാണ് റിപ്പോർട്ടുകൾ. ഇതിൽ 21 കേസുകൾ പ്രത്യേക അന്വേഷണ സംഘം പരിശോധിച്ച് ഹൈക്കോടതിയിൽ റിപ്പോർട്ട് സമർപ്പിക്കുകയും ചെയ്തു. സർക്കാർ ഇടപെടലിനെ തുടർന്ന് ചില കേസുകളിൽ കുറ്റപത്രം സമർപ്പിക്കാതെ നടപടികൾ നീണ്ടുപോകുകയാണെന്നും ആരോപണമുണ്ട്. വിവിധ ബാങ്കുകളിൽ നിന്ന് ഏകദേശം 15,000 കോടി രൂപ സമാഹരിച്ച് അത് മൈക്രോഫിനാൻസ് വഴിയായി യൂനിയൻ അംഗങ്ങൾക്ക് ഉയർന്ന പലിശയ്ക്ക് നൽകിയതുമായി ബന്ധപ്പെട്ടും വിവിധ പൊലീസ് സ്റ്റേഷനുകളിൽ കേസുകൾ രജിസ്റ്റർ ചെയ്തിട്ടുണ്ട്. ഈ പണം ഉപയോഗിച്ച് യൂനിയനുകളുടെ പേരിൽ ഭൂമി വാങ്ങിയതടക്കമുള്ള ഇടപാടുകളും അന്വേഷണ പരിധിയിലുണ്ട്. മാവേലിക്കരയിൽ കോളജ് സ്ഥാപിക്കാൻ വാങ്ങിയ സ്ഥലം അംഗങ്ങളുടെ പേരിൽ എടുത്ത വായ്പ പണം ഉപയോഗിച്ചാണെന്ന പരാതിയും ഉയർന്നിട്ടുണ്ട്. ചില സാഹചര്യങ്ങളിൽ അംഗങ്ങളുടെ പേരിൽ എടുത്ത വായ്പ കാലാവധിക്ക് മുമ്പ് തിരികെ വാങ്ങിയെങ്കിലും അത് ബാങ്കിൽ അടച്ചില്ലെന്നതിനാൽ അംഗങ്ങൾ പലിശക്കുഴപ്പത്തിൽപ്പെട്ടതായും ആരോപണങ്ങളുണ്ട്. കൂടാതെ, എസ്.എൻ.ഡി.പി യോഗത്തിന്റെയും അനുബന്ധ ട്രസ്റ്റുകളുടെയും ചില ആസ്തികൾ വിറ്റതായി എസ്.എൻ.ഡി.പി സംരക്ഷണ സമിതി ആരോപിച്ചിരുന്നു. ഇതിനിടെ, എസ്.എൻ.ഡി.പി നോൺ-ട്രേഡിങ് കമ്പനി എന്ന നിലയിൽ പ്രവർത്തിക്കേണ്ട സ്ഥാപനമെങ്കിലും കമ്പനി നിയമങ്ങൾക്ക് വിരുദ്ധമായി പ്രവർത്തിച്ചെന്ന നിരീക്ഷണത്തിന്റെ അടിസ്ഥാനത്തിലാണ് ഇപ്പോഴത്തെ ഹൈക്കോടതി വിധി ഉണ്ടായതെന്നാണ് റിപ്പോർട്ടുകൾ.